Manuel Valcárcel, «personal shopper» inmobiliario: «A xente empeza buscando casa, pero debería mirar antes como a vai pagar»

Mercar unha vivenda é unha das decisións máis importantes na vida de calquera. E tamén a que máis estrés xenera. Sobre todo na actualidade, cando os prezos non deixan de subir e as reformas non están para todo o mundo. Manuel é un dos tres axentes inmobiliarios centrados no comprador —coñecidos como personal shoppers— que hai en Galicia. El fala da necesidade de asesorarse e informarse en varios aspectos antes de comprar unha casa para que non se complique o proceso.

—En que consiste a figura do personal shopper inmobiliario?

—Consiste en defender os dereitos do comprador. Nas inmobiliarias adóitase pensar que o cliente é o que vende, é o que compra está completamente desprotexido. Un personal shopper sempre vai protexer ao comprador, que pensa que para conseguir unha casa só ten que entrar en portais como Idealista ou Fotocasa. 

—Cal é a principal diferenza entre o seu traballo e o dunha inmobiliaria?

—Ou defendes ao comprador, ou defendes ao vendedor. As inmobiliarias, normalmente, defenden os intereses do vendedor. Eu, pola miña parte, compro para outras persoas coma se fose para min, por iso debo coñecer todos os datos que me permiten buscar o mellor precio tamén para eles.

—Non xestiona vendas? 

—Si, porque lóxicamente a xente que compra conmigo ás veces tamén vende e xestiono propiedades que están no mercado. Primeiro informo aos compradores do que teño e, se non coincide, firmamos contrato indicando que defendo os seus intereses fronte aos do vendedor. Para iso me contratan con provisión de fondos, aceptación de presuposto e contrato. 

—Trátase dunha figura nova en Galicia. 

 —Si, somos só tres en toda a comunidade. En Lugo, A Coruña e Vigo. Tamén porque para entrar na Asociación Española de Personal Shopper Inmobiliarios (AEPSI), que é a que nos acredita, tes que pasar un filtrado e demostrar un mínimo de cinco anos de experiencia. É normal, porque non se pode permitir que unha figura tan nova, que protexe ao comprador, se vexa afectada polo intrusismo. En Madrid e Cataluña levan xa 14 anos. 

—Tendo en conta a situación actual do mercado inmobiliario, cre que é un bo momento para que penetre este perfil?

—Si. De feito agora mesmo é máis momento do comprador que do vendedor. Depende da zona pero, polo xeral, a pouca oferta que hai necesita ser estudada. O comprador ten que analizar as ofertas e o mellor que pode facer é levar ao seu carón alguén que o asesore. Aí é onde entramos os personal shopper inmobiliarios. 

—Que é o primeiro que se debe mirar antes de iniciarse no proceso de compra?

—Mercar unha vivenda é como ser francotirador: tes que estudar ben o terreo, saber de que armas financeiras dispós e onde podes posicionarte para cando apareza a vivenda adecuada chegar a oferta e á negociación nas mellores condicións posibles. A xente comeza buscando casa, cando debería ser ao revés e empezar buscando con que, ou como, financiala. Unha vez consideres isto, a negociación é moito máis sinxela porque se non corres o risco de que, cando encontres a vivenda axeitada, apareza alguén que o ten ben estudado e che roube a oportunidade. 

—Cal é o maior erro que se comete á hora de mercar?

—Para min, mercar sen ningún tipo de asesoramento. Sobre todo poñerse a mirar casas en plataformas, como polos sen cabeza, que igual nin podes adquirir. Iso solo xera frustración durante o proceso. A partir dun profundo análise da situación, é cando podes empezar a decidir e descartar. 

—E á hora de vender?

—Non botar man dun profesional e guiarse polo que eu lle chamo o sistema feira. Moitas veces, a xente pensa que os inmobles custan o que din eles e non están dispostos a baixar o prezo. Por exemplo, a provincia de Lugo é a que peor tempo de venta ten de toda España, e hai algo que non cambia aínda que pasen os anos. Se no primeiro mes un vendedor non ten visitas, nos tres seguintes non ten un inicio de oferta e ao pasar seis non vendeu, está fóra do mercado. No caso de Lugo, o 74% das vivendas véndese despois dos seis meses, e moi por debaixo do que inicialmente anunciaba. Está claro que a un prezo razonable aumenta a demanda e resulta máis fácil vender. 

—Canto pode aforrar de media unha persoa que se asesora antes de adquirir unha vivenda?

—Só por como están inflados os prezos, teño moi claro que de media un 10%. Dependendo do caso, incluso un 15%. E iso só na compra, porque un bo asesoramento financeiro tamén che pode aforrar uns miles de euros. 

—Hai moita febre polas vivendas no ámbito rural. 

—Si. Cada vez hai máis xente que busca estar cerca dos servizos, pero en zonas rurais. Pero a primeira traba coa que te atopas é que moitos dos inmobles, ao redor un 85%, non están no Rexistro da Propiedade. Esta situación impide que a poidas hipotecar e, ademais, dentro dun par de anos pode vir un herdeiro reclamarche a propiedade sen que teñas a que agarrarte. 

—Actualmente, a xente prefire comprar casas ou pisos? 

—Véndense máis pisos. Tamén polo que comentaba anteriormente de que a compra dunha casa é máis complicada polas trabas legais ás que están suxeitas. Aínda que a xente prefire vivir en casas, o proceso de compra dun piso é máis cómodo. 

—O servizo dun personal shopper está o alcance de calquera?

—Si, aínda que a xente pense que é só para os ricos. Teño algún encargo de apartamentos que non chegan aos 100.000 euros. Adaptámonos a situación e as necesidades de cada comprador. 

 

---

---

---